ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᐱᓕᕆᐊᒃᓴᐃᑦ ᓴᖅᑭᓚᐅᖅᓯᒪᔪᑦ ᐱᒋᐊᕈᑎᐅᔪᒥᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂ ᐱᒋᐊᓚᐅᖅᓯᒪᔪᖅ 2000 ᐱᒋᐊᓕᓵᖅᑎᓪᓗᒍ, ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᖃᑎᖃᖅᓱᑎᒃ ᒪᑭᕝᕕᒃ ᑯᐊᐳᕇᓴᒃᑯᓐᓂ ᓄᓇᕕᒥᐅᑦ ᑎᓕᓯᓚᐅᖅᑐᑦ ᒐᕙᒪᑐᖃᒃᑯᓐᓂᑦ ᐱᒋᐊᖅᑎᑦᓯᖁᔨᓪᓗᑎᒃ ᓈᓚᓐᓂᕐᒥᒃ ᕿᒻᒦᔭᕈᑎᐅᓚᐅᖅᓯᒪᔪᓂᑦ 1950ᓂᑦ 1975ᒥᓪᓗ .2

2002ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓐᖑᖅᑎᑦᓯᓚᐅᖅᑐᑦ ᑲᑎᒪᔨᕋᓛᓂ ᑭᓪᓕᓯᓂᐊᖁᔭᐅᓯᒪᓪᓗᑎᒃ ᐃᓅᓯᓕᕆᓂᕐᒧᑦ ᐊᑐᐊᒐᖏᓐᓂᒃ, ᐅᖃᐅᓯᓕᕆᓂᕐᒧᑦ, ᐊᒻᒪ ᕿᒻᒦᔭᖅᑕᐅᓂᖅ/ᓅᑕᐅᓂᕐᓗ.3 2004ᒥ, ᕿᑭᖅᑕᓃᒃᑯᑦ ᓄᐊᓴᐃᕙᓪᓕᐊᓚᐅᖅᑐᑦ ᐃᓄᓐᓂᑦ ᑐᑭᓯᒃᑲᓐᓂᕈᒪᓪᓗᑎᒃ ᖃᓄᖅ ᒐᕙᒪᒃᑯᑦ ᐊᑐᐊᒐᖏᑦ, ᐱᔭᒃᓴᖏᑦ ᑐᑭᑖᕆᓯᒪᓚᐅᖅᑕᖏᓪᓗ ᐊᑦᑐᐃᓯᓚᐅᕐᓂᖏᑦ ᐃᓄᓐᓂ ᐃᓚᒋᔭᖏᓐᓄᓪᓗ ᐊᒻᒪᓗ ᐊᓯᔾᔩᓪᓗᑎᒃ ᖃᓄᖅ ᐱᐅᓯᖃᖅᐸᓚᐅᕐᓂᖏᓐᓄᑦ. ᐊᑦᑐᐃᒍᑕᐅᓂᖅᐹᖑᓚᐅᖅᑐᖅ ᕿᒻᒦᔭᖅᑕᐅᑎᓪᓗᒋᑦ ᐊᒻᒪᓗ ᓅᑕᐅᑎᓪᓗᒋᑦ ᐃᓚᒌᑦ ᓄᓇᒋᕙᓚᐅᖅᑕᖏᓐᓂᑦ4 ᐊᑕᐅᓯᕐᒧᑦ ᓄᓇᓕᑖᖅᑎᑕᐅᓕᖅᑎᓪᓗᒋᑦ.

ᒪᔾᔨ 5 2005, ᑭᐅᔾᔪᑎᒋᔭᐅᓪᓗᓂ ᐊᔭᐅᕈᑎᒋᔭᐅᓂᒃᑯᑦ, ᑖᒃᑯᐊ ᒪᓕᒐᓕᐅᕐᕕᔾᔪᐊᕐᒥ ᑲᑎᒪᔨᕋᓛᖑᔪᑦ ᐃᓄᓕᕆᔨᑐᖃᒃᑯᑦ ᐅᓂᒃᑳᓚᐅᖅᓯᒪᔪᑦ ᒪᓕᒐᓕᐅᕐᕕᔾᔪᐊᕐᒥ ᐱᖁᔨᕗᖔᕈᑎᑎᒍᑦ ᑎᓕᓯᔪᑦ ᒐᕙᒪᑐᖃᒃᑯᓐᓂ ᓈᓚᓐᓂᖃᕐᓗᑎᒃ ᐸᓯᔾᔪᑎᒋᔭᐅᑎᓪᓗᒍ ᕿᒻᒦᔭᖅᑕᐅᓂᖏᑦ ᐃᓄᐃᑦ ᐅᑭᐅᖅᑕᖅᑐᒥ 1950ᒥ ᐊᒪ 1970ᒥ. ᑕᐃᒪᐃᒻᒪᑦ ᑖᓐᓇ ᒥᓂᔅᑕ ᐃᓄᐃᑦ ᐊᑦᑕᕐᓇᖅᑐᒦᑦᑕᐃᓕᖁᓪᓗᒋᑦ ᐊᒻᒪᓗ ᑐᐊᕕᕐᓇᑐᓕᕆᓂᕐᒧᑦ ᐸᕐᓇᐃᔪᓕᕆᓂᕐᒧᑦ, ᐋᓐ ᒪᒃᓖᓚᓐ, ᑐᒃᓯᕋᓚᐅᖅᓯᒪᔪᖅ ᐸᓖᓯᒃᑯᑦ ᓈᒪᔪᒃᑯᑦ ᕿᒥᕐᕈᐃᓂᖃᖁᓪᓗᒋᑦ ᖃᓄᐃᓕᐅᕈᑕᐅᓚᐅᖅᑐᓕᒫᓂᒃ ᐱᔾᔪᑎᒋᓪᓗᒋᑦ ᐃᓄᐃᑦ ᕿᒻᒥᖏᑦ ᐅᑭᐅᖅᑕᖅᑐᒥ ᐊᕐᕌᒍᓂ ᑕᐃᔭᐅᓯᒪᔪᓂᑦ.5

ᑕᐃᒪᐃᒻᒪᑦ ᑖᓐᓇ ᐸᓖᓯᒃᑯᑦ ᐅᓂᒃᑳᓕᐊᖏᑦ ᐃᒪᐃᓕᖓᓕᓚᐅᖅᑐᖅ ᐱᑕᖃᓚᐅᓐᖏᒻᒪᒡᒎᖅ ᓇᓗᓇᐃᔭᐅᑎᓂᒃ ᕿᒻᒦᔭᖅᑐᖃᕈᒪᔪᖃᓚᐅᓐᖏᑦᑐᖅ ᐸᓖᓯᒃᑯᓐᓂᑦ ᑕᐃᔅᓱᒪᓂ ᐊᐱᖅᑯᑎᒋᔭᐅᔪᒥᒃ, ᓇᒻᒥᓂᖅ ᐱᓕᕆᐊᖏᓐᓄᑦ ᐅᕝᕙᓘᓐᓃᑦ ᑎᓕᔭᐅᓯᒪᔪᓂᑦ ᒐᕙᒪᒃᑯᑦ ᐊᑐᐊᒐᖏᓐᓂᓪᓗ. ᑭᓯᐊᓂᓕ, ᐃᓚᖏᑦ ᕿᒻᒦᑦ ᑐᖁᑕᐅᓚᐅᖅᑐᑦ ᐱᔾᔪᑎᖃᖅᓱᑎᒃ ᐊᑦᑕᕆᔭᐅᓪᓗᑎᒃ ᐊᒻᒪ ᐋᓐᓂᐊᖃᕐᓂᖏᓐᓂᓪᓘᓐᓃᑦ..6 ᐸᓖᓯᒃᑯᑦ ᐅᓂᒃᑳᖏᑦ ᓈᒻᒪᒋᔭᐅᓐᖏᑲᐅᑎᒋᔭᐅᓚᐅᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᒪᑭᕝᕕᒃᑯᓐᓄᑦ, ᑐᓴᖅᑎᑦᓯᓚᐅᖅᑎᓪᓗᒋᑦ 2006ᒥ ᐃᑲᔪᖃᑕᐅᓂᐊᕐᓂᖏᓐᓄᑦ ᓱᓕᔪᒥᒃ ᑭᓪᓕᓯᓂᐊᖁᔨᖃᑕᐅᓪᓗᑎᒃ “ᓱᓕᔪᑦ ᓴᖅᑭᖁᓪᓗᒋᑦ”7.

2007ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓛᒃᑯᑦ ᐱᓐᖑᖅᑎᑦᓯᓚᐅᖅᑐᑦ ᐊᒻᒪᓗ ᑮᓇᐅᔭᖃᖅᑎᑦᓯᓪᓗᑎᒃ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂ ᓈᒪᓯᒪᔪᓂᒃ ᐊᑐᖅᑕᐅᓚᐅᖅᑐᕕᓂᕐᓂᒃ ᑐᑭᓯᒍᑎᖃᒃᑲᓐᓂᖁᓪᓗᒍ ᑐᑭᑖᕆᔭᐅᓯᒪᔪᓂᑦ ᐊᒻᒪᓗ ᖃᓄᐃᓕᐅᕈᑎᐅᓯᒪᔪᓂᓪᓗ ᐊᑦᑐᐃᒍᑎᒋᔭᐅᓚᐅᖅᑐᓄᑦ ᐃᓄᓐᓄᑦ ᕿᑭᖅᑖᓗᒻᒥ 1950ᓂᑦ ᐊᒻᒪᓗ 1975ᒥ ᐊᒻᒪᓗ ᓴᖅᑭᑎᑦᓯᖁᔨᓪᓗᑕ ᖃᓄᐃᓕᐅᕈᑕᐅᓯᒪᔪᓂᒃ ᐸᐃᑉᐹᒃᑯᑦ ᐃᓄᐃᑦ ᐊᑐᓚᐅᖅᓯᒪᔭᖏᓐᓄᑦ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᓯᕗᓪᓕᖅᐹᖑᔪᑦ ᐃᓄᓐᓂᑦ ᐃᑲᔪᖅᑕᐅᓯᒪᔪᖅ ᐊᒻᒪᓗ ᐃᓄᓐᓄᑦ ᐱᓕᕆᐊᖑᓯᒪᔪᖅ ᑕᐃᒪᐃᑦᑐᓂᒃ. ᑕᒪᒃᑯᐊ ᐊᓯᖃᓐᖏᑦᑐᑦ ᓈᒪᓪᓗᓂ ᓈᓚᓐᓂᕆᔭᐅᓯᒪᔪᖅ ᐃᓅᓯᕐᓄᑦ ᐊᑦᑐᐃᒍᑎᒋᔭᐅᒻᒪᕆᑦᑐᓄᑦ ᓯᕗᒃᑲᖅᑕᖅᑕᐅᓪᓗᓂ ᐃᓄᐃᑦ ᑎᒥᖁᑎᖓᓄᑦ.

2 ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔩᑦ, ᔪᓚᐃ 5, 2000: “ᕿᒻᒦᑦ ᑐᖁᑕᐅᓂᖏᑦ. ᑐᑭᓯᒋᐊᕋᓱᓐᓂᖅ ‘ᕿᒻᒦᔭᕐᓂᐅᑉ ᑐᑭᖓ”. ᖃᕆᑕᐅᔭᒃᑯᑦ ᐱᔭᐅᒍᓐᓇᖅᑐᖅ: http://www.nnsl.com/frames/newspapers/2000-06/jun5_00dogs.html
4 ᐃᓄᒃᑎᑐᑦ ᑐᑭᖓ "ᓄᓇ ᐊᑐᖅᑕᐅᑲᐃᓐᓇᓲᖅ ᐃᓄᓐᓄᑦ ᐆᒪᔪᖅᑕᖃᑦᓯᐊᕐᓂᖓᓂ ᐊᒻᒪᓗ ᑲᑎᕝᕕᐅᓪᓗᓂᓘᓐᓃᑦ"
5 ᓄᓇᑦᓯᐊᖅ ᐱᕙᓪᓕᐊᔪᖏᑦ, ᑎᓯᐱᕆ 8, 2006. “ᐸᓖᓯᒃᑯᑦ: ᕿᒻᒦᑦ ᑐᖁᑕᐅᔪᑦ ᐊᑦᑕᕆᔭᐅᓪᓗᑎᒃ ᐋᓐᓂᐊᖃᕋᒥᓘᓐᓃᑦ”. ᖃᕆᑕᐅᔭᒃᑯᑦ ᐱᔭᐅᒍᓐᓇᖅᑐᖅ: http://www.nunatsiaqonline.ca/archives/61208/news/nunavut/61208_03.html
6 ᐸᓖᓯᒃᑯᑦ. 2006. “ᑭᖑᓪᓕᖅᐹᖅ ᐅᓂᒃᑳᑦ ᕿᒥᕐᕈᓂᕐᒥᒃ ᐸᓯᔭᐅᔾᔪᑕᐅᔪᓂᒃ ᐃᓄᐃᑦ ᕿᒻᒥᖏᑕ ᒥᒃᓵᓄᑦ
7 QIA and Makivik Corporation. 2006. “Press Release: RCMP self-investigation does not reveal the truth about the slaughter of Inuit sled dogs in the 1950s and 1960s”.