ᓴᐃᒪᖃᑎᒌᓐᓂᖅ: ᓴᐃᒻᒪᖃᑎᖃᕐᓂᖅ ᑕᐃᔅᓱᒪᓂ ᐊᑭᓕᒥᓂᖏᓐᓂᒃ

ᑭᖑᓪᓕᖅᐹᖅᓯᐅᑏᑦ ᐊᐅᓚᔫᓕᐊᖑᓯᒪᔪᑦ ᑕᕐᕆᔭᒐᐃᑦ ᐅᓂᒃᑳᓕᐊᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓴᖅᑭᑎᑕᐅᓚᐅᖅᓯᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓴᖅᑭᑦᑎᖁᓪᓗᒋᑦ ᓱᓕᔪᓂᒃ ᐊᒻᒪᓗ ᒥᑦᓯᖃᑦᑎᐊᖅᑐᓂᒃ ᑕᐃᓱᒪᓂᑐᖃᖅ ᐃᓱᒪᓕᐊᕆᔭᐅᓂᑯᓂᑦ ᐊᒻᒪᓗ ᐱᓂᑰᔪᓂᒃ ᐊᑦᑐᖅᓯᓯᒪᔪᑦ ᐃᓄᐃᑦ ᓄᓇᖃᖅᑐᑦ ᕿᑭᖅᑕᓂ ᐅᑭᐅᒐᓵᓗᓐᓄᑦ ᐱᒋᐊᖅᑐᒍ 1950ᒥᑦ, ᐊᒻᒪᓗ ᐸᐃᑉᐹᑦ ᐊᑦᑐᖅᓯᓯᒪᓂᖁᐃᑦ ᐃᓄᐃᑦ ᐃᓅᓯᖏᓐᓂᑦ. ᐅᑭᐅᓄᑦ ᐱᖓᓱᓄᑦ, ᑭᓪᓕᓯᓂᐊᖅᑏᑦ ᐃᖏᕐᕋᔭᓚᐅᖅᑐᑦ ᑕᒪᐃᓐᓄᑦ 13-ᓄᑦ ᕿᑭᖅᑕᓂ ᓄᓇᓕᓐᓄᑦ, ᐃᖅᑲᐅᒪᓂᖃᖅᑐᑎᒃ ᐅᓐᓂᖅᓯᐅᕈᑎᒋᔭᖏᑦ ᑕᐃᒃᑯᓇᓐᖓ ᐅᖓᑖᓄᑦ 300 ᐊᑐᓂᑦ ᐃᓄᐃᑦ, ᐊᒻᒪᓗ ᕿᒥᕐᕈᐃᓪᓗᑎᒃ ᑕᐅᓴᓐᑎᓃᑦᑐᓂᒃ ᐅᓄᖅᑐᐊᓗᓐᓂ ᒪᑉᐱᒐᓂᑦ ᒐᕙᒪᒃᑯᓐᓂᑦ ᑕᐃᔅᓱᒪᓂᐊᓗᒃ ᑐᖅᑯᖅᓯᒪᔭᖏᓐᓂᒃ.

ᐅᓇ ᕿᓪᓕᖅᑐᑦ ᑕᑯᑦᓴᐅᑎᑦᑎᔪᖅ ᓯᑕᒪᐃᓕᖓᔪᓂᒃ-ᐃᓚᖏᑦ ᑕᕐᕆᔭᒐᐃᑦ ᐊᐅᓚᔫᓂᒃ ᑭᓪᓕᓯᓂᐊᖅᑏᑦ ᑭᖑᓪᓕᖅᐹᖅᓯᐅᑎᖏᓐᓂᒃ ᐅᓂᒃᑳᖑᓪᓗᑎᒃ:

  • ᐃᓚᖓᓂ 1 ᐅᓂᒃᑳᑦᑎᐊᖅᑐᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᑕᐃᓱᒪᓂᑕᓂᒃ, ᑎᓕᔭᐅᓯᒪᔾᔪᑎᖏᑦ ᐱᔭᒃᓴᕆᓪᓗᒋᑦ, ᐅᐸᒃᓯᓂᖏᑦ ᐊᒻᒪᓗ ᑲᔪᓯᓂᖏᑦ.
  • ᐃᓚᖓᓂ 2 ᓇᓗᓇᐃᖅᓯᒪᔪᑦ ᑭᓪᓕᓯᓂᐊᖅᑏᑦ ᖃᐅᔨᓯᒪᔭᖏᓐᓂᒃ.
  • ᐃᓚᖓᓂ 3 ᐅᖃᐅᓯᖃᖅᑐᑦ ᖃᐅᔨᒪᔭᐅᓗᐊᕆᐊᖃᖅᑐᓂᑦ ᑭᓪᓕᓯᓂᐊᖅᑏᑦ ᐊᑐᓕᖁᔨᔾᔪᑎᖏᓐᓂᒃ.
  • ᐃᓚᖓᓂ 4 ᓇᐃᓈᖅᓯᒪᔪᑦ ᑎᑎᕋᖅᓯᒪᔪᑦ ᐅᓂᒃᑳᑦᑎᐊᖅᑐᑦ ᑭᖑᓪᓕᕐᒥ ᐱᒋᐊᕈᑕᐅᓂᐊᖅᑐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.