ᓇᒦᓕᖅ ᐱᑕ ᐅᓪᓗᒥ

ᑖᓐᓇ ᑭᖑᓪᓕᖅᐹᖅ ᐅᓂᒃᑳᓕᐊᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ ᓴᖅᑭᑎᑕᐅᓚᐅᖅᑐᑦ ᐅᒃᑑᕙ 20, 2010ᒥ ᐃᓚᒋᔭᐅᖃᑕᐅᓪᓗᓂ ᐊᕐᕌᒍᑕᒫᖅᓯᐅᑎᐅᔪᒥᒃ ᑲᑎᒪᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ. ᐱᖓᓱᓂᒃ ᐊᕐᕌᒍᑦ ᖄᖏᖅᐸᓪᓕᐊᑎᓪᓗᒋᑦ, ᐱᓕᕆᔪᒪᔪᖃᓕᓚᐅᕐᖓᑦ ᐱᕙᓪᓕᐊᒍᑕᐅᒍᒪᓪᓗᑎᒃ ᑐᓴᒐᒃᓴᐅᔪᓂᑦ ᓄᐊᑕᐅᓚᐅᖅᑐᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᑭᓪᓕᓯᓂᐊᖃᑦᑕᖅᑎᓪᓗᒋᑦ. ᑕᒪᓐᓇ ᑕᐃᒪ ᐊᔾᔨᒌᓐᖏᑦᑐᓂᒃ ᖃᐅᔨᓴᕆᐊᖃᓚᐅᕐᓂᑦᑎᓐᓄᑦ ᐃᓱᒫᓘᑎᒋᔭᐅᔪᓄᑦ ᓴᖅᑭᑦᑐᕕᓂᐅᔪᓂᒃ ᑭᖑᓪᓕᖅᐹᕐᒥ ᐅᓂᒃᑳᓕᐊᓂᒃ ᐊᒻᒪᓗ ᐅᓂᒃᑳᓕᐅᖅᑐᖃᖅᓱᓂᒃ ᓄᓇᓖᑦ ᖃᓄᐃᓕᖓᓂᖏᑦᑕ ᒥᒃᓵᓄᑦ ᑕᒪᐃᓐᓄᑦ ᓄᓇᓕᓐᓄᑦ ᕿᑭᖅᑖᓗᒻᒥ. ᑕᒪᒃᑯᐊ ᐱᓕᕆᐊᖑᓯᒪᑎᓪᓗᒋᑦ ᐊᒥᓱᓐᖑᖅᓯᒪᓕᕐᒪᑕ ᐊᒻᒪᓗ ᐱᔭᕇᖅᑕᐅᓯᒪᑦᑎᐊᓕᖅᑐᑦ ᓴᖅᑭᑎᑕᐅᒍᒪᓕᖅᑐᑎᒃ ᕿᑭᖅᑖᓗᒻᒥᐅᓄᑦ ᐊᒻᒪᓗ ᑲᓇᑕᒥᐅᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᒃᑐᑎᒃ ᓴᖅᑭᑎᑦᓯᒍᒪᒻᒪᑕ ᓈᒪᓗᑎᒃ ᐅᓂᒃᑳᓕᐊᓂᒃ ᐱᓕᕆᐊᖑᖃᑕᐅᑎᓪᓗᒋᑦ ᑲᔪᓯᓯᒪᔪᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ. ᑕᒪᒃᑯᐊ ᐅᓂᒃᑳᓕᐊᑦ ᐅᑯᐊᖑᕗᑦ: ᓄᓇᓖᑦ ᖃᓄᐃᓕᖓᓂᖏᑦ ᒥᒃᓵᓄᑦ ᐅᓂᒃᑳᑦ 13ᓄᑦ ᕿᑭᖅᑖᓗᒻᒥ ᓄᓇᓕᓐᓄᑦ, ᐊᒻᒪᓗ ᒪᕐᕉᒃ ᐊᔾᔨᐅᓐᖏᑦᑐᒃᑯᑦ ᖃᐅᔨᓴᖅᑕᐅᓚᐅᖅᑐᓄᑦ: “ᐸᓖᓯᒃᑯᑦ ᓇᓗᓇᐃᔭᐃᓂᖏᑦ ᐊᒻᒪᓗ ᐃᓄᐃᑦ ᕿᒧᒃᓯᐅᑎᖏᑦ ᕿᒻᒦᑦ ᒥᒃᓵᓄᑦ ᐅᓂᒃᑳᓕᐊᖏᑦ (2006)” ᐊᒻᒪᓗ “ᐃᓱᒪᐅᓯᕆᓚᐅᖅᑕᖏᑦ ᐊᑕᐅᓯᕐᒧᕋᐃᕙᓪᓕᐊᓂᖏᓐᓄᑦ ᓄᓇᓕᓐᓂ ᑲᑎᑦᓯᒍᒪᓂᖏᓐᓄᑦ: ᒐᕙᒪᒃᑯᑦ ᓯᕗᓕᖅᑎᖏᑦ ᐊᒻᒪᓗ ᕿᑭᖅᑖᓗᒻᒥ 1950ᒥ 1975ᒧᑦ.” ᓱᓕᓗ ᐃᓚᐅᖃᑕᐅᔪᑦ ᑕᒪᒃᑯᓂᖓ ᐱᓕᕆᐊᖑᓯᒪᔪᓂᑦ, 7ᖑᔪᑦ ᐅᓂᒃᑳᓕᐊᖑᓯᒪᔪᑦ ᐱᔾᔪᑎᖃᖅᑐᓄᑦ ᓱᕐᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥᒃ, ᐃᓪᓗᓕᕆᓂᖅ, ᐱᕙᓪᓕᐊᔪᓕᕆᓂᖅ, ᐸᓖᓯᓕᕆᓂᖅ, ᐃᓕᓐᓂᐊᖅᑐᑦ, ᕿᒻᒦᑦ1, ᐊᒻᒪ ᓅᖃᑦᑕᕐᓂᖏᓪᓗ.

ᑖᒃᑯᐊ ᐅᓂᒃᑳᓕᐊᑦ ᓴᖅᑭᑎᑕᐅᓂᐊᖅᑐᑦ ᖃᓄᐃᓕᐅᕈᑕᐅᓕᖅᑎᓪᓗᒋᑦ ᐅᒃᑑᕙ 9, 2013ᒥ ᐊᖕᓚᑲᒃᑯᑦ ᑲᑎᒪᕕᐊᓂ ᐃᖃᓗᓐᓂ, ᓄᓇᕗᑦ. ᑖᓐᓇ ᐱᒻᒪᕆᐅᓂᐊᕐᒪᑦ ᖃᓄᐃᓕᐅᕈᑎᐅᓂᐊᖅᑐᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᐃᓚᒋᔭᖃᕐᓗᑎᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᑲᒥᓴᓇᒋᓚᐅᖅᑕᖓᓂᒃ ᔭᐃᒥᓯ ᐃᒡᓗᓕᐅᖅᑎᒥᒃ, ᓄᓇᕗᒧᑦ ᒪᓕᒐᓕᐅᖅᑎ ᓕᐅᓇ ᐊᒡᓘᑲᖅ, ᓯᕗᓕᖅᑏᑦ ᓄᓇᕗᑦ ᒐᕙᒪᒃᑯᓐᓂᑦ ᐊᒻᒪᓗ ᑕᐃᒃᑯᐊ ᐃᓄᐃᑦ ᐅᓐᓂᕐᓗᒃᓴᓚᐅᖅᑐᑦ ᑲᒥᓴᓐᒧᑦ.

ᓴᖅᑭᑎᑕᐅᓂᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᖏᑦ ᐱᒋᐊᕈᑎᐅᓂᐊᕐᒪᑦ ᐱᓕᕆᐊᒃᓴᒃᑲᓐᓂᕐᓂᑦ ᐃᖅᑲᓇᐃᔭᖃᑎᒋᓗᒋᑦ ᐃᓄᐃᑦ ᐊᒻᒪ ᒐᕙᓚᒃᑯᓐᓄᑦ ᓯᕗᒧᐊᖅᑕᐅᖁᓪᓗᒋᑦ ᐊᑐᓕᖁᔭᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ. ᐃᓄᒃᑎᑐᑦ ᑕᐃᒎᓰᑦ, ᕿᑭᖅᑕᓂ ᐃᓄᐃᑦ ᓴᐃᒻᒪᖃᑎᒌᒃᐸᓪᓕᐊᓂᕐᒥᒃ ᑐᕌᒍᒪᔪᑦ: ᓴᐃᒻᒪᖃᑎᒋᓗᒋᑦ ᐊᑭᕋᕆᔭᐅᓚᐅᖅᑐᑦ, ᐊᒻᒪᓗ ᐃᓅᖃᑎᒌᒍᓐᓇᖅᓯᑎᒃ ᐅᐱᒍᓱᓪᓗᑎᒃ ᐃᓚᐃᓐᓴᖅᓯᐅᕆᓐᖏᓪᓗᑎᓪᓗ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᐅᓐᓂᖃᖅᐳᑦ ᑖᒃᑯᐊ ᖃᐅᔨᔭᐅᔪᑦ ᐊᑐᓕᖁᔭᐅᔪᓪᓗ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂᑦ, ᐃᓚᒋᓪᓗᒋᑦ ᑖᒃᑯᐊ ᐅᓂᒃᑳᑦ ᐃᓚᒋᔭᐅᔪᑦ ᑖᒃᑯᓂᖓ ᓄᐊᑕᐅᓯᒪᔪᓂᒃ ᐅᓂᒃᑳᓕᐊᑦ, ᓴᓐᖏᓂᖅᑖᖅᑎᑦᓯᓂᐊᖅᑐᑦ ᐃᓄᓐᓂᒃ ᐊᒻᒪ ᒪᒥᓴᕈᓐᓇᖅᓯᓗᑎᓪᓗ ᐋᓐᓂᐊᕈᑎᒋᔭᒥᓂᒃ, ᑲᔪᖏᖅᓴᐃᓂᕐᓗ ᐃᓱᒪᒋᔪᓐᓃᕐᕕᖃᕈᓐᓇᖅᓯᓂᖅᕐᒥᒃ ᐃᓚᒌᓂᒃ ᐊᒻᒪᓗ ᐃᓕᖅᑯᓯᖃᑎᒋᓐᖏᑦᑕᖏᓂᓪᓗ.
1 ᐃᓄᒃᑎᑐᑦ ᑕᐃᒎᓯᖓ ᐃᓄᐃᑦ ᕿᒧᒃᓯᐅᑎᖏᑦ ᕿᒻᒥᑦ