ᒪᒃᑖᖅ ᐊᑯᒪᓕᒃ

ᒪᒃᑖᖅ ᐊᑯᒪᓕᒃ ᐃᓅᓕᓚᐅᖅᓯᒪᔪᖅ 1932ᖑᑎᓪᓗᒍ ᑳᒡᕕᖕᒥ ᖃᒪᓂᑦᑐᐊᑉ ᖃᓂᒋᔮᓂ. ᐃᓚᒌᑦ ᑐᓄᓂᕈᓯᕐᒥᐅᑕᙳᓚᐅᖅᓯᒪᕗᑦ 1949ᒥ, ᐊᒻᒪ ᓅᑎᑕᐅᓪᓗᑎᒃ ᐃᒃᐱᐊᕐᔪᖕᒧᑦ 1966ᒥ. ᐅᓂᒃᑲᐅᓯᒃᑯᑦ ᓇᓗᓇᐃᖅᓯᓂᕐᒥᒍᑦ ᑐᓴᐅᓯᖅᓯᕗᖅ ᕿᒥᑦ ᒥᒃᓵᓄᑦ ᐊᑐᐊᒐᐅᔪᓂᒃ ᐊᒻᒪ ᖁᑭᐊᔭᐅᓂᖏᓐᓂᒃ. ᒪᒃᑖᖅ ᕿᒻᒥᕋᓱᒃᑎᐅᓚᐅᖅᓯᒪᕗᖅ ᐊᕐᕌᒍᓄᑦ ᐱᖓᓱᐸᓗᖕᓄᑦ. ᐸᓖᓯᓪᓗ ᐃᑲᔪᖅᐸᓚᐅᖅᐸᐃᑦ ᑲᐳᕋᐃᑎᓪᓗᒋᑦ ᐱᖦᖤᙱᓴᔾᔭᐃᒃᑯᑎᒥᒃ. ᐅᓂᒃᑳᖅᐳᖅ ᕿᒻᒥᕋᓱᒃᑎᐅᓂᕐᒥᓄᑦ ᐊᑭᓕᖅᓱᖅᑕᐅᓚᐅᖅᓯᒪᙱᑦᑎᐊᕐᓂᕋᖅᖢᓂ. ᓇᓗᓇᐃᔭᖅᐳᕐᓗ ᐃᓄᒋᔭᓂᒃ ᑐᓴᖅᑎᑦᑏᓐᓇᐅᔭᖃᑦᑕᓚᐅᕆᐊᒃᓴᒥᓂᒃ ᕿᒻᒥᓂᒃ ᖁᑭᐊᓚᐅᕋᓂ. ᐃᖅᑲᐅᒪᙱᑦᑎᐊᖅᐳᖅ ᕿᒻᒥᖃᖅᑎᐅᔪᓄᑦ ᓂᙵᐅᔾᔭᐅᓚᐅᖅᓯᒪᔭᕆᐊᒃᓴᖅ ᓵᑕᐅᓂᖃᕆᐊᒃᓴᕐᓘᓐᓃᑦ. ᐃᖅᑲᐅᒪᕗᕐᓗ ᐃᓄᖕᓄᑦ ᖁᑭᐊᓯᖁᔭᐅᖃᑦᑕᓚᐅᕐᓂᕐᒥᓂᒃ ᕿᒻᒥᒥᓂᒃ ᓯᑭᑑᖅᑖᖅᑐᓗᕋᒥᒃ. ᒪᒃᑖᖅ ᒫᓐᓇᐅᔪᒃᑯᑦ ᐃᓚᐅᖃᑕᐅᓂᖃᓪᓚᕆᒃᐳᖅ ᒪᒥᓴᕐᓂᕐᒥᒃ ᓄᓇᓕᖕᒥᖕᓂ.