ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᖃᓄᖅ ᐱᓕᕆᖃᕐᓂᐊᕐᓂᖏᑦ ᐋᖅᑭᐅᒪᓚᐅᕐᓂᖓ

2007ᒥᑦ 2010ᒧᑦ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᓄᓴᐃᓚᐅᖅᑐᑦ ᐅᓐᓄᕐᓗᒃᓴᐅᑎᒋᔭᐅᔪᓂᒃ ᖃᓄᐃᓕᐅᕈᑎᒋᔭᐅᓯᒪᔪᓂᑦ ᐊᕐᕌᒍᓂᑦ 1950ᓂᑦ 1975ᒥᓗ ᐃᓄᓐᓂᑦ ᐊᑐᓚᐅᖅᑐᓂᒃ ᐊᒃᓱᕈᓐᓇᓚᐅᖅᑐᒥᒃ; ᐊᐱᖅᓱᖅᓱᒋᑦ ᖃᓪᓗᓈᑦ ᐃᖅᑲᓇᐃᔭᓚᐅᖅᓯᒪᔪᓄᑦ ᑕᒫᓂ ᓱᕐᓗ ᐸᓖᓯᑦ ᓄᖅᑲᖅᓯᒪᔪᑦ, ᒐᕙᒪᒃᑯᓐᓂᑦ ᓯᕗᓕᖅᑏᑦ ᐊᒻᒪᓗ ᐃᓕᓴᐃᔨᒻᒪᕇᑦ; ᐊᒻᒪᓗ ᐱᔭᕇᖅᓱᒋᑦ ᑕᒪᒃᑭᐅᒪᔪᒃᑯᑦ ᐱᑐᖃᓂᒃ ᐸᐃᑉᐹᖁᑎᒋᔭᐅᔪᓂᒃ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐊᐱᖅᓱᓚᐅᖅᑐᑦ 345ᓂ ᐅᓐᓂᕐᓗᒍᒪᔪᓄᑦ ᐊᒻᒪᓗ 16ᓂᒃ ᐃᓄᓕᒫᓄᑦ ᓈᓚᓐᓂᖃᖅᓱᑎᒃ, ᕿᒥᕐᕈᐃᓚᐅᖅᑐᑦ 131ᓂ ᓂᐱᓕᐅᖅᓯᒪᔪᓂᒃ ᕿᑭᖅᑕᓃᒃᑯᓐᓄᑦ ᐊᕐᕌᒍᓂᑦ 2004ᒥ ᐊᒻᒪ 2006ᒥᓗ, ᐊᒻᒪᓗ ᓄᐊᑕᐅᓯᒪᔪᓂᒃ ᐱᒍᓐᓇᖅᓯᓪᓗᑕ ᖃᓄᖅ ᐃᖅᑲᓇᐃᔭᖃᑎᒌᖃᑦᑕᓚᐅᕐᓂᖏᑦ ᐃᓄᐃᑦ ᐊᒻᒪ ᒐᕙᒪᒃᑯᓪᓗ ᐊᕐᕌᒍᓂ 1950ᓂ 1975ᒥᓗ. ᑖᒃᑯᐊ ᐱᓕᕆᐊᖑᔪᑦ ᐊᑐᖅᑐᒋᑦ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᑎᑎᕋᓚᐅᖅᑐᑦ ᐊᒥᓲᔪᓂᒃ ᑐᑭᑖᕈᑕᐅᓯᒪᔪᓂᒃ, ᖃᓄᐃᓕᐅᕈᑎᒋᔭᐅᓯᒪᔪᓂᒃ ᐊᑐᖅᑕᐅᓚᐅᖅᑐᑦ ᑕᐃᔅᓱᒪᓂ ᐊᑲᐅᓐᖏᓕᐅᕈᑎᒋᔭᐅᓚᐅᖅᑐᓄᑦ ᐃᓄᓐᓄᑦ ᐊᒻᒪᓗ ᑐᐊᕕᖅᑐᒃᑯᑦ ᐃᓅᓯᖏᑦ ᐊᓯᔾᔨᕆᐊᖃᓕᖅᓱᑎᒃ ᑕᒪᓐᓇ ᐱᔾᔪᑎᒋᓪᓗᒍ ᕿᑭᖅᑖᓗᒻᒥ.

ᑖᒃᑯᐊ ᐅᓂᒃᑳᓕᐊᖑᔪᑦ ᐅᓂᒃᑳᕐᓂᖃᖅᑐᑦ ᐊᑐᖅᑕᐅᓚᐅᖅᑐᓂᒃ ᕿᑭᖅᑖᓗᒻᒥᐅᓄᑦ ᒪᓕᒃᑐᒋᑦ ᐃᓄᐃᑦ ᐊᑐᓚᐅᖅᑕᖏᑦ ᐅᓐᓂᕐᓗᒃᓴᐅᑕᐅᓯᒪᑎᓪᓗᒋᑦ ᑲᒥᓴᓐᑯᓐᓄᑦ, ᐊᒻᒪᓗ ᖃᐅᔨᓴᖅᑕᐅᓯᒪᔪᓂᑦ ᐸᐃᑉᐹᓂ. ᑖᒃᑯᐊ ᐅᓂᒃᑳᑦ ᓇᓗᓇᐃᔭᐃᓯᒪᔪᑦ ᖃᓄᖅ ᐃᓅᓰᑦ ᕿᑭᖅᑖᓗᒻᒥ ᐊᓯᔾᔨᓚᐅᕐᓂᖏᑦ ᑖᒃᑯᐊ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐱᓕᕆᓕᖅᑎᓪᓗᒋᑦ ᐱᓪᓗᒋᑦ ᑕᒪᒃᑯᐊ ᒐᕙᒪᒃᑯᑦ ᑐᑭᑖᕆᖃᑦᑕᖅᓯᒪᔭᖏᓐᓂᒃ ᐊᑐᐊᒐᕆᔭᖏᓐᓂᓪᓗ.

ᓯᑎᐱᕆᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᓐᖔᖅᑐᑦ ᑲᑎᖃᑎᖃᓚᐅᕐᖓᑕ ᒐᕙᒪᑐᖃᒃᑯᓪᓗ ᐊᑐᕚᒥ. ᐱᔾᔪᑎᖃᖅᓱᑎᒃ ᑐᓂᓯᒍᒪᓪᓗᑎᒃ ᐅᓂᒃᑳᑦ ᐊᔾᔨᖏᓐᓂᒃ ᐊᒻᒪᓗ ᓯᕗᒧᐊᕋᓱᓪᓗᒋᑦ ᓴᖅᑭᓚᐅᖅᑐᓂᑦ ᐊᑐᓕᖁᔭᐅᒪᔪᓂᓪᓗ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᔪᓯᓯᒪᔪᒃ ᐱᓕᕆᐊᖃᐃᓐᓇᖅᑐᑦ ᓇᓗᓇᐃᔭᐅᑎᓂᒃ ᐱᓇᓱᐊᖏᓐᓇᕋᓱᓪᓗᑎᒃ ᐊᒻᒪᓗ ᑕᓯᐅᖃᑎᖃᕈᓐᓇᕐᓗᑎᒃ ᓇᓗᓇᐃᖅᓯᔪᖃᕐᓗᓂ ᑖᒻᒪᕈᑎᒋᔭᐅᓚᐅᖅᑐᓂᒃ ᐊᒻᒪᓗ ᐊᑐᓕᖅᑎᑕᐅᓗᑎᒃ ᐊᑐᓕᖁᔭᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ.

ᐱᒻᒪᕆᐅᔪᑦ ᖃᐅᔨᔭᐅᔪᑦ

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᑐᑭᑖᓕᓚᐅᖅᑐᑦ ᑖᒃᑯᐊᒎᖅ ᒐᕙᒪᑐᖃᒃᑯᑦ ᐱᔾᔪᑎᒋᔭᐅᓪᓗᖅᓱᑎᒃ ᐃᓄᐃᑦ ᐃᓅᓯᖏᑦ ᐊᓯᔾᔨᒻᒪᕆᓚᐅᖅᑐᑦ ᕿᑭᖅᑖᓗᒻᒥ 1950ᓂ 1975ᒥᓗ. ᐊᑐᐊᒐᐃᑦ ᐱᔭᒃᓴᕆᔭᐅᔪᐃᓪᓗ ᐱᔾᔪᑎᒋᔭᐅᓪᓗᑎᒃ ᓱᕐᓗ ᐃᑉᐱᒍᓱᓐᓂᖃᓐᖏᔅᓱᑎᒃ, ᒐᕙᒪᓕᕆᓂᕐᒧᑦ ᐱᕙᓕᐊᖁᔨᓂᕐᒥᓪᓗ ᐃᓄᓐᓂᒃ ᑐᑭᓯᒋᐊᕋᓱᓐᖏᑦᑎᐊᖅᑐᑎᒃ ᐊᖏᖅᓯᒪᓇᑎᓪᓘᓐᓃᑦ ᐱᔾᔪᑎᒋᔭᐅᓚᐅᖅᑐᑦ ᖃᓪᓗᓈᑎᑐᑦ ᐃᓕᖅᑯᓯᖃᖔᖁᔨᓪᓗᑎᒃ. ᓱᓕᓗ, ᑕᒪᓐᓇ ᐃᑲᔪᕈᒪᓪᓗᑎᒃ ᐃᓄᓐᓂ ᐱᓕᕆᐊᖃᕋᓱᓚᐅᕐᓂᖏᑦ ᓱᓕᓚᐅᓐᖏᑦᑐᖅ, ᐃᓄᐃᑦ ᐃᓕᖅᑯᓯᖓ ᐃᓱᒋᔭᐅᓚᐅᓐᖏᑦᑐᖅ ᑐᑭᓯᔭᐅᓯᒪᓇᓂᓗ; ᐱᓕᕆᐊᖑᔪᑦ ᐸᕐᓇᑕᐅᓯᒪᑦᑎᐊᖃᑦᑕᓐᖏᔅᓱᑎᒃ; ᐊᐅᓚᑕᐅᑦᓯᐊᖃᑦᑕᓐᖏᔅᓱᑎᓪᓗ ᐅᕝᕙᓘᓐᓃᑦ ᑮᓇᐅᔭᖃᖅᑎᑕᐅᑦᑎᐊᖅᐸᓐᖏᔅᓱᑎᒃ.

ᑕᐃᒪᐃᒻᒪᑦ, ᐃᓄᐃᑦ ᐃᑉᐱᒍᓱᓕᑲᐅᑎᒋᔪᑦ ᐊᑦᑐᖅᑕᐅᓯᒪᓂᖏᓐᓄᑦ ᐊᓯᔾᔨᖅᑕᐅᓂᖏᓐᓄᑦ ᑕᐃᔅᓱᒪᓂ, ᒪᒃᑯᐊ ᐊᑦᑐᐃᒍᑕᐅᔪᑦ ᓱᓕ ᐃᑉᐱᒋᔭᐅᔪᑦ ᐅᓪᓗᒥ ᑭᖑᕚᓄᑦ. ᓱᓕ ᐃᓄᐃᑦ ᐅᓪᓗᒥ ᐊᒃᓱᕈᓐᓇᖅᑐᓂᒃ ᐃᑉᐱᒍᓱᓲᖑᕗᑦ, ᓱᕐᓗ ᐊᔪᖅᓴᕐᓂᖅ, ᑎᒍᔭᐅᒪᓂᖅ, ᑎᒥᖓ ᐊᔪᕈᑎᖃᕐᓂᕐᒥᒃ ᐊᒻᒪᓗ ᐋᓐᓂᐊᖃᕐᓂᖅ. ᐊᑕᐅᑦᑎᒃᑯᓪᓗ ᐱᕕᒃᓴᖃᕐᓂᖅᓴᐅᓕᖅᑐᖅ ᐃᓚᒋᔭᐅᒍᓐᓇᖅᓯᓂᕐᒥᒃ ᑲᓇᑕᒥ ᒐᕙᒪᓕᕆᓂᐅᔪᓂᒃ ᐊᒻᒪᓗ ᐃᓕᖅᑯᓯᕆᔭᐅᔪᓂᒃ, ᑕᒪᓐᓇ ᓱᓕ ᖃᓄᐃᓐᓂᐅᔪᖅ ᐃᓄᐃᑦ ᖃᐅᑕᒫᑦ ᐊᒃᓱᕉᓴᖅᑐᑦ.