ᔮᓐ ᐃᓗᐹᓕᒃ

ᔮᓐ ᐃᓗᐹᓕᒃ ᐃᓅᓕᓚᐅᖅᓯᒪᔪᖅ 1954ᒥ. ᐅᓂᒃᑲᐅᓯᒃᑯᑦ ᓇᓗᓇᐃᖅᓯᓂᕆᔭᖓ ᑐᓴᐅᓯᕐᓇᖅᐳᖅ ᐊᑐᓚᐅᖅᑕᖓᓂᒃ ᐋᓐᓂᐊᕐᓂᖅ ᐱᓪᓗᒍ ᐊᐅᓪᓚᖅᑎᑕᐅᔭᕆᐊᖃᓚᐅᖅᓯᒪᓂᕆᔭᖓᓂᒃ ᐊᒻᒪ ᐊᐅᓪᓚᐅᒪᓪᓗᓂ ᐃᓕᓐᓂᐊᕆᐊᖅᓯᒪᓂᕆᓚᐅᖅᓯᒪᔭᖓᓂᒃ. ᐊᖓᔪᒥ ᕿᒻᒥᖏᓐᓄᑦ ᐅᒋᐊᖅᑕᐅᒐᒥ ᒪᓐᑐᕆᐊᒧᑦ ᐊᐅᓪᓚᖅᓯᒪᔭᕆᐊᖃᓚᐅᑲᓚᐅᖅᓯᒪᖕᒪᑦ. 6ᓂᒃ ᐅᑭᐅᖃᖅᖢᓂ ᑭᐱᙳᓇᖅᑐᓪᓛᓘᓪᓗᓂᓗ. ᐅᑎᕋᒥ ᕿᑭᖅᑖᕐᔪᖕᒧᑦ ᐱᖃᓐᓇᕆᔭᖏᑦ ᐊᐅᓪᓚᖅᑳᑎᒋᓐᓂᖅᖢᑎᒃ ᐃᓕᓐᓂᐊᕆᐊᖅᖢᑎᒃ. ᐊᑯᓂᒍᓱᑦᑎᐊᓚᐅᖅᑐᖅ ᐃᓕᓐᓂᐊᕆᐊᕈᓐᓇᖅᓯᓛᕋᔭᕆᐊᒃᓴᖅ ᑎᑎᕋᕈᓐᓇᖅᓯᓗᓂᓗ ᐅᖃᓕᒫᕈᓐᓇᖅᓯᓛᕋᒥ ᓇᔭᖕᒥᑐᑦ. ᐃᓕᓐᓂᐊᕆᐊᖅᑎᑕᐅᑕᐃᓐᓇᓕᓚᐅᖅᐳᖅ ᐃᒡᓗᓕᒑᕐᔪᖕᒧᑦ ᑕᐃᑲᓂᓗ ᐊᖏᕐᕋᖅᓯᖅᑐᕐᔪᐊᕌᓘᕙᓚᐅᖅᖢᓂ ᐱᓗᐊᖅᑐᒥ ᐱᖃᓐᓇᕆᓛᕆᔭᒥᓂᒃ ᑲᑎᙵᓯᔪᓐᓇᓚᐅᙱᓐᓇᒥ. ᐊᐅᓪᓚᐅᒪᓪᓗᓂ ᐃᓕᓐᓂᐊᕆᐊᖅᓯᒪᓂᕆᔭᒥᓄᑦ ᐊᓯᔾᔨᖅᑎᑕᐅᒻᒪᕆᓚᐅᖅᐳᖅ ᐊᒻᒪ ᐊᖓᔪᖅᑳᓂ ᐋᓪᓚᐅᖅᑰᔨᒋᓕᖅᖢᓂᒋᒃ ᐊᖏᕐᕋᒧᑦ ᐅᑎᖅᓯᒪᓕᑕᐃᓐᓇᕋᒥ. ᐊᒃᑐᖅᑕᐅᕐᔪᐊᖅᓯᒪᓚᐅᖅᐳᖅ ᓯᕗᓕᒥ ᐅᒃᐱᕆᕙᓚᐅᖅᑕᖏᑦ ᐊᖓᒃᑯᐃᑦ ᐃᒃᓯᕋᕐᔪᐊᓄᑦ ᓱᓇᐅᔪᓐᓃᖅᑎᑕᐅᓯᒪᑦᑎᐊᓚᐅᕐᓂᖏᓐᓄᑦ ᑕᒪᓐᓇᓗ ᑕᐃᒪᙵ ᐊᒃᓱᕈᕈᑎᒌᓐᓇᖅᐹ.