ᐊᐱᐊ ᕿᓕᖅᑎ

ᐊᐱᐊ ᕿᓕᖅᑎ ᐃᓅᓚᐅᖅᓯᒪᔪᖅ ᐃᒐᕐᔪᐊᕐᒥ 1956-ᖑᑎᓪᓗᒍ. 1962-63 ᐊᑐᖅᑎᓪᓗᒋᑦ, 6-ᓂᑦ 7-ᓂᒡᓘᓐᓃᑦ ᐅᑭᐅᖃᖅᑎᓪᓗᒍ, ᐊᐱᐊ ᐊᒻᒪᓗ ᐃᓚᔮᕇᒃ ᒥᑦᑎᒪᑕᓕᖕᒧᑦ ᓅᓚᐅᖅᓯᒪᔪᑦ ᐃᓕᓴᐃᔨ ᐃᒐᕐᔪᐊᕐᒧᐊᓚᐅᖅᑎᓪᓗᒍ ᐅᖃᐅᔾᔨᓪᓗᓂᓗ ᐊᐱᐊᒥᒃ ᐊᓂᒃᓴᖓᓂᒡᓗ ᒥᑭᓯᒥᒃ ᐃᓕᓐᓂᐊᕆᐊᖃᕐᓂᖏᓐᓂᒃ. ᓄᒃᑎᓚᐅᖅᑎᓪᓗᒋᑦ, ᑐᐱᕐᒥᐅᑕᐅᓚᐅᑲᓚᐅᖅᓯᒪᔪᑦ ᑰᑉ ᓴᓂᐊᓂ ᐃᒡᓗᒃᓴᖃᓐᖏᓗᐊᕐᓂᕐᒧᑦ. ᐊᐱᐊ ᐃᖅᑲᐅᒪᔪᖅ ᑕᐃᔅᓱᒪᓂ ᐃᓚᒌᑦ ᕿᒻᒥᖃᓚᐅᖅᓯᒪᓐᖏᓐᓂᖏᓐᓂᒃ, ᐊᒻᒪᓗ ᖃᐅᔨᒪᓐᖏᖢᓂ ᓱᖕᒪᑦ ᕿᒻᒥᖃᓚᐅᓐᖏᓐᓂᖏᓐᓂᒃ. ᓇᓗᓇᐃᖅᓯᓚᐅᖅᓯᒪᔪᖅ ᑕᐃᔅᓱᒪᓂ ᐊᑖᑕᑦᑎᐊᖓ ᐃᖅᑲᓇᐃᔭᖃᑦᑕᓚᐅᖅᓯᒪᓂᖓᓂᒃ ᐸᓖᓯᒃᑯᓐᓄᑦ ᐃᑲᔪᖅᑎᐅᓪᓗᓂ ᐊᒻᒪᓗ ᑕᕝᕙᓐᖓᔅᓴᐃᓐᓇᖅ ᓄᖅᑲᓚᐅᖅᓯᒪᓂᖓᓂᒃ. ᒥᑦᑎᒪᑕᓕᖕᒦᓕᖅᑎᓪᓗᒋᑦ ᐊᕐᕌᒍᐊ ᑐᒡᓕᐊᓂ, ᐊᐱᐊᒃᑯᑦ ᐃᓚᔮᕇᒃ ᑭᑉᐹᕆᒃᑐᑯᓗᖕᒧᑦ ᐃᒡᓗᒧᑦ ᓄᒃᑎᓚᐅᖅᓯᒪᔪᑦ. ᐃᒡᓗᑯᓗᖕᒥ ᐃᓂᒃᖠᐅᓗᐊᕐᓂᖏᓐᓄᑦ, ᐊᐱᐊ ᐳᕙᒡᓗᓕᓚᐅᖅᓯᒪᔪᖅ ᐊᒻᒪᓗ ᐄᔭᒐᖃᑦᑕᕆᐊᖃᓕᖅᖢᓂ. 1982-ᖑᓕᖅᑎᓪᓗᒍ, 20-ᓂᒃ ᐊᕐᕌᒍᖃᓕᖅᖢᓂ, ᐊᐱᐊ ᐅᐃᓂᓚᐅᖅᓯᒪᔪᖅ ᐊᒻᒪᓗ ᐅᐃᒌᒃ ᐊᑐᖅᑐᐊᓕᖅᖢᑎᒃ ᐃᒡᓗᒥᒃ. ᐊᐱᐊ ᐃᓕᓐᓂᐊᖅᓯᒪᔪᖅ ᖁᕝᕙᓯᖕᓂᓕᒃ 9-ᒧᑦ, ᐃᑦᑐᒃᑯᖏᓐᓄᓪᓗ ᐃᖃᓗᖕᓄᑦ ᐃᓕᓐᓂᐊᕆᐊᒃᑲᓐᓂᖁᔭᐅᓚᐅᖅᓯᒪᓐᖏᖢᓂ.