ᔭᐃᑯᐱ ᓄᕿᓐᖓᖅ

ᔭᐃᑯᐱ ᓄᕿᓐᖓᖅ ᐃᓅᓚᐅᖅᓯᒪᔪᖅ 1942-ᒥ. ᓄᓇᓕᕋᓛᕐᒥᐅᑕᐅᓚᐅᖅᑐᖅ ᕿᑭᖅᑕᕐᔪᐊᑉ ᐊᒻᒪᓗ ᑲᖏᖅᑐᒑᐱᐅᑉ ᐊᑯᓐᓂᖓᓂ. ᔭᐃᑯᐱ ᐅᓂᒃᑲᐅᓯᖃᖃᓯᐅᔾᔨᓚᐅᖅᑐᖅ ᐊᖑᓇᓱᒍᓯᕐᓂᒃ ᓄᓇᖓᑕ ᖃᓂᒋᔮᓂ. 30-ᓂᒃ ᐊᕐᕌᒍᖃᓕᖅᖢᓂ ᓄᓕᐊᓂᓚᐅᖅᓯᒪᔪᖅ ᐊᒻᒪᓗ ᓅᖢᑎᒃ ᐹᓚᒡᕕᖕᒧᑦ. ᑕᐃᑲᓂ ᓄᓇᖃᖅᑎᓪᓗᒋᑦ, ᐃᖅᑲᐅᒪᔪᖅ ᓄᒃᑎᕆᐊᖃᓕᓚᐅᕐᓂᖏᓐᓂᒃ ᐊᒻᒪᓗ ᓄᓇᖅᑲᑎᒌᑦ ᖃᓪᓗᓈᓂᒃ ᑲᑉᐱᐊᒋᔭᖃᕐᓂᕐᒧᑦ ᐊᓐᖔᑐᐃᓐᓇᓚᐅᖅᓯᒪᓂᖏᓐᓂᒃ. ᕿᑭᖅᑕᕐᔪᐊᕐᒧᑦ ᓄᒃᑎᖅᓯᒪᓕᕋᒥᒃ, ᔭᐃᑯᐱ ᐃᖅᑲᐅᒪᔪᖅ ᕿᒻᒥᖏᑦ ᑐᖁᕋᖅᑕᐅᓚᐅᖅᓯᒪᓂᖏᓐᓂᒃ. ᐅᖃᓚᐅᕐᒥᔪᖅ ᑕᐃᔅᓱᒪᓂ 9-ᓂᒃ ᕿᒻᒥᖃᓚᐅᖅᓯᒪᓂᕕᓂᕐᒥᓂᒃ. ᔭᐃᑯᐱ ᐃᖅᑲᐅᒪᔪᖅ ᐹᑉ ᐸᐃᓚᑦ ᖁᑭᐊᖃᑕᐅᓚᐅᖅᓯᒪᓂᖓᓂᒃ ᕿᒻᒥᓂᒃ. ᐃᖅᑲᐅᒪᓐᖏᑦᑐᖅ ᖃᓄᐃᓕᐅᖅᑕᐅᓚᐅᖅᓯᒪᖕᒪᖔᖏᑦ ᕿᒻᒥᕕᓃᑦ. ᐅᓪᓗᒥᒧᑦ ᑎᑭᖢᒍ ᔭᐃᑯᐱ ᓱᓕ ᑐᑭᓯᓚᐅᖅᓯᒪᓐᖏᑦᑐᖅ ᓱᖕᒪᑦ ᓄᒃᑎᕆᐊᖃᓚᐅᖅᓯᒪᖕᒪᖔᖏᑦ.